Portugezi Ruben Saraiva rrezikon dënimin me burgim të përjetshëm për ekzekutimin mafioz të biznesmenit Ardian Nikulaj në lokalin e tij në Shëngjin për motive hakmarrje. Prokuroria e Lezhës kërkoi dënimin e Saraivës me burg përjetë për akuzat e “vrasja e kryer për interes ose hakmarrje dhe armëmbajtje pa leje. Sipas prokurorisë nga hetimi është provuar se Saraiva ka patur rolin e ekzekutorit në ngjarje.
Edmond Haxhia, i afërm i familjes Lekstakaj, akuzohet si organizator i vrasjes. Ai ndodhet në burg në Britaninë e Madhe në pritje të procedurës së ekstradimit. Si informatorë shërbyen 4 shtetas britanikë, përfshirë dhe një grua, të cilët janë po ashtu në përballje me drejtësinë britanike për t’u ekstraduar në vendin tonë. Ardian Nikulaj u ekzekutua në lokalin e tij në Shëngjin në prill të 2023, nga një person që ishte maskuar si postier, krim që në atë kohë tronditi opinionin publik.
