Gjykata e Vlorës ka zbutur masën e sigurisë nga “arrest në burg” në “arrest në shtëpi” për Erald Cenaj, i arrestuar për veprën penale “krijim të kushteve për të kryer vrasje” në ngjarjen e datës 13 janar 2025, ku u ekzekutua Kristian Marku alias Bardhi.
Cenaj u arrestua pas ngjarjes, pasi makina që u përdor në vrasje, tip Volkswagen Golf 5, që u gjet e djegur në fshatin Panaja të Vlorës, rezulton se kishte ardhur nga Sllovenia në Kosovë e më pas në Shqipëri, dhe mendohet se ishte blerë prej tij. Pas këtij zbulimi, ai u arrestua, për t’u liruar gjashtë muaj më vonë, pasi nuk u gjetën prova të tjera që e lidhnin me vrasjen.
Hetimet për Cenaj vijojnë, teksa ai ndodhet në arrest shtëpie, ndërsa policia ende nuk ka rënë në gjurmët e ekzekutorëve dhe urdhëruesve. Dyshimet e grupit hetimor kanë rënë mbi Flodian Plakun, i njohur si Pole Qorri, i cili u arrestua 3 ditë më parë në Vlorë, teksa ishte një ndër personat më të kërkuar në vend. Kjo, sepse nga hetimet rezulton se Kristian Marku kishte shkuar në Vlorë për të marrë kontakt me Plakun dhe ai mund ta ketë tradhtuar. Kristian Marku është nipi i Martin Bardhit, i vrarë në Rrëshen. Familja Bardhi është në hasmëri me familjen Reçi në Mirditë.
