Zbardhen dëshmitë e personave që panë të ndjerin Anesti Rama, përpara se ai të vritej nga e bija Emalinda dhe partneri i saj, Çlirim Dogani, ndërsa bashkëshortja e tij, Valbona Rama, i ndihmoi të fshihnin vrasjen.
Anesti Rama u mbyt me tel dhe më pas vajza dhe gruaja tentuan të fshihnin krimin, duke e veshur viktimën me kostum me qëllim që të kryenin ceremoninë mortore.
Dëshmitë
Dëshmia e komshies
Fatmire Ndreko (komshie, me banesë përballë hyrjes së shtetasit Anesti Rama) ka deklaruar se ka parë që shtetasi Anesti Rama është kthyer nga puna me biçikletë rreth orës 16:00. Ka lënë biçikletën te një pemë ulliri që ka para banesës dhe rreth orës 20:00 ajo ka parë që janë kthyer Valbona dhe Emalinda, të cilat, pasi hynë në banesën e tyre, pas rreth 5–10 minutash ka dëgjuar shtetasen Emalinda Rama, vajzën e Anestit, që thirri para banesës së saj: “O xha Monë, hajde se ka vdekur babi”, duke i lajmëruar se i ati i saj kishte vdekur. Ajo nuk ka dëgjuar zhurmë dhe as të bërtitura.
Llukan Dhano, punëtor në një firmë, ka dëshmuar se Anesti Rama ka qenë në punë, është larguar nga puna rreth orës 16:00 si çdo ditë dhe i ka thënë që i mbahej fryma, nuk ndihej mirë. Ai ka deklaruar se nuk ka dijeni që Anesti të ketë pasur konflikte me persona të tjerë.
Dëshmia e Marius Dudës
Ai deklaron se Valbona dhe Emalinda Rama i ka marrë për punë në orën 15:45 minuta dhe, pasi kanë mbaruar punë, ai i ka çuar përsëri në afërsi të banesës së tyre rreth orës 20:05 minuta. Gjatë kohës që kanë punuar tek ai, nuk kanë shfaqur ndonjë shqetësim, kanë punuar normalisht, etj.
