“Ti je spiun i policisë. Na spiunove dhe ata na bllokuan makinën…”. Me këtë akuzë nisi gjithçka. Alti Nallbati, vëllai i deputetit demokrat Bledion Nallbati, bashkë me Marsel Bucin dhe Trajan Çelikun, dyshohet se i shkuan në shtëpi Ilir Topciut — një 32-vjeçari që ndodhej në masën “arrest në shtëpi” — duke e marrë me forcë dhe më pas e dhunuar në ambientet e një biznesi privat.
Sipas kallëzimit të viktimës, tre të dyshuarit e akuzonin atë se i kishte “spiunuar” në polici, çka sipas tyre kishte sjellë ndalimin e automjetit të tyre. Ngjarja e rëndë ndodhi më 27 tetor, ndërsa kallëzimi u bë më 30 tetor 2025.
Tre të dyshuarit u vunë në pranga nga policia për veprat penale të “Heqjes së paligjshme të lirisë”, “Kanosjes” dhe, për njërin prej tyre, “Plagosjes së lehtë me dashje”. Fillimisht, sipas burimeve, rasti është tentuar të paraqitet si një konflikt i momentit mes palëve, por më pas është vënë në lëvizje edhe Drejtoria e Standardeve, e cila ka nisur hetim për mënyrën se si u trajtua ngjarja në fazën e parë nga policia lokale.
Njoftimi zyrtar i Policisë së Devollit
Sipas Policisë së Shtetit, specialistët për Hetimin e Krimeve bënë ndalimin e tre shtetasve pas kallëzimit të 32-vjeçarit I.T., i cili deklaroi se ishte marrë me forcë nga banesa e tij në fshatin Braçaj, ndërsa po vuante masën “arrest në shtëpi”. Ai u çua në një biznes privat, ku u mbajt për disa orë, u kërcënua për jetë dhe u dhunua fizikisht.
Në pranga u vunë:
• A.N., 42 vjeç, banues në Bilisht
• T.Ç., 38 vjeç, banues në Braçanj
• M.B., 37 vjeç, banues në Devoll
Të tre akuzohen për heqje të paligjshme të lirisë, kanosje dhe plagosje të lehtë, të kryera në bashkëpunim.
Policia njofton se, nën drejtimin e Prokurorisë, vijon puna për dokumentimin e plotë të ngjarjes dhe sqarimin e motivit. Materialet procedurale i janë referuar Prokurorisë së Korçës për veprime të mëtejshme.
