Prokuroria e Vlorës ka sekuestruar pasuri me vlerë rreth 3.5 milionë euro, në kuadër të një hetimi për veprën penale “Pastrimi i produkteve të veprës penale ose veprimtarisë kriminale”. Objekt i procedimit penal janë shtetasi Agron Lamaj dhe subjekti “Rei Royal” shpk.
Sipas njoftimit zyrtar të Prokurorisë, masa e sekuestrimit është vendosur nga Gjykata e Shkallës së Parë të Juridiksionit të Përgjithshëm, Vlorë, dhe përfshin 17 pasuri, përfshirë apartamente, garazhe, njësi biznesi dhe trualla.
Pasuritë e sekuestruara përfshijnë:
Dy parcela me pemëtore (1000 m² dhe 600 m²) në pronësi të shtetasit A.L.;
Truall me sipërfaqe 249.5 m²;
Dy apartamente (126.6 m² dhe 143.7 m²) në pronësi të shtetasit A.L.;
Dy njësi biznesi (51.61 m² dhe 49.64 m²) në pronësi të subjektit “Rei Royal”.
Prokuroria njofton se sekuestrimi është një masë parandaluese për të garantuar procesin hetimor dhe të ardhurat nga pasuritë e përfshira në hetim.
Hetimi është zhvilluar në kuadër të procedimit penal nr. 1329 të vitit 2022 dhe mbetet i hapur.
