Lulzim Berisha dhe Durim Bami janë transferuar këtë të mërkurë në Burgun e Sigurisë së Lartë në Peqin, pasi dyshohet për shkelje të rregullave të sigurisë brenda institucioneve ku mbaheshin.
Mësohet se transferimi i tyre nga institucionet e paraburgimit në Durrës dhe Fushë Krujë është kryer për arsye sigurie, pasi ekzistonin të dhëna konfidenciale se të paraburgosurit mund të kishin akses në telefona celularë apo sende të tjera të ndaluara në qeli.
Në vijim të këtyre informacioneve, drejtuesit e burgjeve kanë urdhëruar zhvendosjen e tyre drejt Burgut të Sigurisë së Lartë në Peqin, institucion që konsiderohet me nivel më të lartë kontrolli dhe mbikëqyrjeje.
Ndërkohë, gjatë javëve të fundit, Drejtoria e Përgjithshme e Burgjeve ka intensifikuar kontrollet operative në institucionet penitenciare në të gjithë vendin, në kuadër të masave për forcimin e sigurisë dhe parandalimin e aktiviteteve të paligjshme brenda qelive.
Gjatë kontrolleve janë sekuestruar sende të ndaluara, përfshirë mjete prerëse të improvizuara, telefona celularë dhe orë inteligjente, të cilat dyshohet se mbaheshin në mënyrë të kundërligjshme nga të burgosur në institucione të ndryshme penitenciare.
