Gjykata e Posaçme rrëzoi kërkesat e avokatëve që mbrojnë interesat e të pandehurve të dosjes “Partizani” për pavlefshmëri absolute të akteve hetimore të SPAK.
Bëhet fjalë për vendimet e marra gjatë hetimeve paraprake nga gjyqtarja Irena Gjoka, e cila është kallëzuar nga ish-kryeministri Sali Berisha se ka fshehur një rekord kriminal në Greqi. Sipas gjykatës kërkesat janë të pabazuara në ligj dhe prova.
“Të gjitha pretendimet për masat e sigurimit i janë nënshtruar kontrollit gjyqësor deri në Gjykatën Kushtetuese, rrëzohet kërkesa për pavlefshmëri absolute”, tha GJKKO. Ndërkohë sa i takon pretendimeve për ekspertë të palicensuar apo në konflikt interesi, gjykata konstaton se nuk përfshihen në rastet kur sjell pavlefshmëri.
Pas rrëzimit të kërkesave, prokurorja e posaçme Enkeleda Millonai lexoi kërkesën për gjykim për të pandehurit dhe akuzat respektive.
I pandehuri kryesor në proces është ish-kryeministri Sali Berisha, ndaj të cilit rëndon akuza e korrupsionit kryer në bashkëpunim, dhëndri i tij Jamarbër Malltezi nën akuzë për korrupsion e pastrim parash si dhe disa bashkëpunëtorë të tyre.
Avokatët e të pandehurve, pasi u lexua kërkesa për gjykim e SPAK, kërkuan kohë dhe në seancën e radhës më 25 nëntor palët do të paraqesin parashtrimet e tyre për provat.
