Policia e Vlorës ka ndaluar dy persona të dyshuar për dhunimin e rëndë të një 61-vjeçari, ngjarje e ndodhur një ditë më parë përballë tregut të Çoles. Të arrestuarit janë shtetasit Ermal Sakaj dhe Klaudio Nurçaj, të dy me precedentë të mëparshëm penalë.
Sipas burimeve zyrtare, viktima e sulmit është Kozma Kukli, i cili u godit fizikisht me sende të forta nga dy persona që mbërritën me një furgon, zbritën prej tij dhe e sulmuan në mes të rrugës, duke i shkaktuar dëmtime të rënda trupore.
Banorët e zonës i dolën në ndihmë të moshuarit, duke njoftuar menjëherë ambulancën dhe policinë. 61-vjeçari u transportua në spitalin e Vlorës, ku mjekët konfirmuan se ai kishte pësuar plagë në kokë dhe dëmtime serioze në syrin e djathtë, të cilat mund të rrezikojnë shikimin.
Pamjet nga vendngjarja tregojnë se viktima ishte i shtrirë në trotuar, me rroba të përgjakura, si pasojë e dhunës së ushtruar ndaj tij.
Policia po vijon hetimet për zbardhjen e plotë të ngjarjes dhe motivet që çuan në këtë akt dhune.
