Një ngjarje e rëndë është shënuar sot në zonën e Lungomares në Vlorë, ku pronari i një lokali është dhunuar fizikisht nga tre persona të paidentifikuar.
Sipas informacioneve paraprake, pronari i bar-restorantit/picerisë është goditur nga tre individë, duke pësuar dëmtime të konsiderueshme që e çuan për trajtim të menjëhershëm në spital.
Ngjarja ka ndodhur në një zonë të populluar nga qytetarë dhe turistë, duke shkaktuar panik tek të pranishmit. Familjarët dhe qytetarët që ndodheshin aty kanë njoftuar menjëherë Policinë e Shtetit.
Forcat e rendit kanë mbërritur në vendngjarje dhe kanë nisur hetimet për zbardhjen e plotë të rrethanave. Autorët janë larguar me shpejtësi pas sulmit dhe aktualisht janë në kërkim.
Policia po punon për identifikimin dhe kapjen e tyre, ndërsa grupi hetimor po mbledh provat dhe dëshmitë për të saktësuar motivet e ngjarjes.
