Zbardhen detaje të reja nga vrasja e 66-vjeçarit Rexhep Ismaili, ngjarje e ndodhur në një lokal pranë një karburanti.
Sipas të dhënave paraprake, një grup prej 5-6 të rinjsh ka shkuar rreth orës 21:28 në lokalin në pronësi të Ismailit. Ata dyshohet se kishin një konflikt të mëparshëm me një banor të fshatit Gjashtë për çështje pronësie.
Në momentin e mbërritjes së tyre, personi me të cilin kishin konflikt ndodhej në verandën e lokalit, në një tavolinë së bashku me Rexhep Ismailin dhe tre persona të tjerë. Mes palëve ka nisur fillimisht një debat verbal, i cili më pas ka degjeneruar në përplasje fizike me sende të forta.
Dyshohet se shënjestra fillestare e konfliktit nuk ka qenë 66-vjeçari. Pas goditjeve, Ismaili është futur brenda lokalit dhe ka dalë me një armë zjarri tip “Kallashnikov”, duke qëlluar disa herë në drejtim të grupit të të rinjve.
Në përgjigje, një prej tyre ka përdorur pistoletë dhe ka qëlluar Ismailin në kokë, duke i shkaktuar vdekjen e menjëhershme në vendngjarje.
