Bashkëshortja e Gazment Buçpapaj, autor i dyshuar për vrasjen e Egli Pashollarit, ka dhënë dëshminë e saj duke zbuluar detaje mbi ngjarjen e ndodhur më 20 shkurt 2026 në Tiranë. Sipas burimeve,Laureta Buçpapaj ka deklaruar se rreth orës 15:05, pasi përfundoi punën, u largua me automjetin “Audi” që drejtohej nga bashkëshorti i saj.
Gjatë lëvizjes në rrugët “Ylbere Bylykbashi” dhe “Kongresi i Lushnjës”, një automjet gri u kishte bllokuar rrugën. Sipas saj, bashkëshorti i kishte rënë borisë për ta sinjalizuar të lëvizte, por drejtuesi tjetër i kishte ofenduar. Më pas, automjeti gri ndaloi dhe prej tij zbritën tre persona, duke çuar në një përplasje fizike.
Laureta Buçpapaj deklaron se ndërhyri për të ndarë palët dhe më pas konstatoi se shoferi ishte i gjakosur. Çifti u largua fillimisht me makinë, të cilën e braktisën rreth 50 metra nga vendi i ngjarjes, dhe më pas me taksi drejt banesës.
Në banesë, sipas saj, Gazment Buçpapaj ndërroi rrobat dhe u largua në këmbë drejt qendrës së Tiranës pa marrë telefonin. Ajo shtoi se nuk e ka parë momentin e goditjes, por dyshon se bashkëshorti mund të ketë përdorur një thikë me palosje që e kishte parë më herët në makinë.
