Ura mbi lumin Mat në aksin Lezhë–Milot është ura e tretë në këtë zonë që ka pësuar dëmtime. Ndërhyrjet e pakontrolluara në shtratin e lumit kanë sjellë pasoja të konsiderueshme, duke shkaktuar erozion pranë këmbëve mbajtëse të urës. Për këtë arsye kërkohet ndërhyrje e menjëhershme nga ARRSH për të parandaluar përkeqësimin e mëtejshëm të situatës.
Rëndësia e urës automobilistike mbi lumin Lumi Mat është edhe më e madhe pasi ajo është aktualisht e vetmja lidhje funksionale që bashkon Milotin me Lezhën dhe Shkodrën. Më herët janë dëmtuar rëndë edhe Ura e Zogut, monument kulture i kategorisë së parë, si dhe ura në aksin e vjetër Lezhë–Milot, e cila vijon të jetë e bllokuar që prej korrikut të vitit të kaluar.
Po ashtu, kjo urë shërben si një korridor i rëndësishëm rrugor drejt kufirit me Mali i Zi. Për këtë arsye, çdo dëmtim i saj ndikon drejtpërdrejt në qarkullimin e automjeteve dhe në lidhjen e zonave veriore të vendit.
Ura mbi lumin Mat ka një gjatësi rreth 300 metra dhe është ndërtuar në vitin 2002 me mbështetjen e qeverisë italiane. Që prej ndërtimit të saj nuk janë kryer ndërhyrje të rëndësishme për mbrojtjen nga erozioni apo për forcimin e këmbëve mbajtëse.
Mësohet se dëmtimi i saj vjen edhe për faktin se në shtratin e lumit Mat operojnë rreth 40 firma që merren me nxjerrjen e inerteve. Në brigjet e lumit vërehen edhe grumbuj të mëdhenj inertesh, të cilët dëshmojnë për aktivitetin intensiv të këtij sektori në zonë.
Pandaj autoritetet përgjegjëse duhet të vihen në lëvizje sa më shpejt të jetë e mundur për të parandaluar ndonjë fatkeqësi tjetër për të cilën do bëjnë sërish fajtorë shiun.
