Bandat shqiptare po përdorin rrjetet sociale si TikTok dhe Facebook për të shitur cigare me çmime të ulëta me “dërgesë ekspres” në shtëpitë britanike, sipas një hetimi të publikuar nga Daily Mail.
Hetimi zbuloi disa faqe në gjuhën shqipe që ofronin marka të njohura cigaresh për klientë në Mbretërinë e Bashkuar. Sipas raportimit, cigaret përshkruheshin si të ardhura nga Shqipëria ose Greqia dhe shiteshin për 6–7 paund për paketë, ndërkohë që çmimi mesatar në tregun britanik arrin rreth 16 paund. Diferenca e madhe në çmim ngre dyshime se produktet janë kontrabanduar për të shmangur taksën e duhanit dhe mund të jenë edhe të falsifikuara.
Një nga llogaritë e identifikuara në TikTok dhe Facebook operonte me një emër që përkthehet si “paketa cigaresh shqiptare”, duke ofruar cigare nga Shqipëria dhe Greqia me shpërndarje direkte në banesë. Sipas gazetës, një gazetari iu ofruan paketa me çmim 6.50 paund, krahasuar me 17.75 paund që kushtojnë në supermarketet britanike. Një prej faqeve në TikTok është hequr pas raportimit nga media britanike.
