Në të gjitha komisariatet e kryeqytetit janë shoqëruar 41 protestues, nga të cilët 19 vetëm në Komisariatin Nr. 1, është shprehur kreu i grupit parlamentar demokrat, Gazment Bardhi. Ai njoftoi se mes të shoqëruarve ka një numër të konsiderueshëm të miturish dhe një person me aftësi të kufizuara, i cili u trajtua me vonesë mjekësore pas reagimit të Partisë Demokratike.
“Vetëm pasi janë vënë në dijeni, është lejuar që personi i dhunuar gjatë shoqërimit të marrë ndihmë mjekësore. Brenda atij rrethimi mbahen në shkelje të ligjit tre të mitur. Avokatja e PD-së ka ndjekur procedurat,” tha Bardhi. Ai shtoi se në këtë komisariat nuk është konstatuar asnjë shkelje ligjore nga protestuesit.
Bardhi akuzoi policinë për sjellje të dhunshme dhe për sulme ndaj besimtarëve myslimanë brenda xhamisë. Ai komentoi gjithashtu reagimin e kryeministrit Edi Rama ndaj ngjarjes, duke e cilësuar si “mllef dhe urrejtje ndaj qytetarëve që protestojnë”.
