Një banor i pallatit që u përfshi nga flakët pasditen e së martës në zonën e njohur si “Farmacia 10”, pranë QSUT, ka treguar se e ka kaluar natën jashtë, pasi apartamenti i tij u dëmtua nga zjarri.
Në një prononcim për mediat, ai u shpreh se banesa, të cilën e kishte blerë dy vite më parë për 150 mijë euro, është shkatërruar plotësisht nga flakët.
"Shtëpia 150 mijë euro, e kam blerë para dy vjetësh. Është bërë shkrumb komplet edhe nuk të lë kush që të futesh brenda me parë shtëpinë time. Përjashta e kam kaluar natën, Unë jam prej Dibre, nuk kam shtëpi këtu", tha ai.
Sipas informacioneve paraprake, dyshohet se rreth 30 apartamente janë djegur, ndërsa një bilanc i saktë pritet të bëhet publik në orët në vijim.
