Banorët e Tërpan, në Poliçan, kanë dalë sot në protestë duke bllokuar për rreth një orë rrugën nacionale Tërpan–Përmet.
Shkak i reagimit është bërë ndërtimi i aksit Tërpan–Ballaban–Përmet, që sipas tyre ka bllokuar dhe ngushtuar rrugën hyrëse të fshatit. Banorët shprehen se nuk mund të hyjnë lirisht me automjete në banesa dhe as me mjete bujqësore në plantacionet me ullinj.
Ata theksojnë gjithashtu se punimet kanë bllokuar kanalet kulluese, duke shkaktuar vërshime ujërash në zonën e banuar. Protestuesit i bëjnë apel institucioneve për ndërhyrje të menjëhershme, në mënyrë që të hapet rruga e fshatit dhe të garantohet akses normal për banorët dhe fermerët.
Një tjetër shqetësim i ngritur nga banorët lidhet me cilësinë e punimeve. Megjithëse rruga ende nuk është asfaltuar plotësisht, segmentet e shtruara deri tani kanë pësuar çarje përgjatë gjithë gjatësisë dhe në disa pjesë edhe rrëshqitje.
