Banorët e disa fshatrave të bashkisë Selenicë, në qarkun e Vlorës, kanë protestuar këtë të diel për mungesën e infrastrukturës rrugore. Protesta paqësore u zhvillua në hyrje të rrugës së degraduar që lidh fshatrat Velca, Matogjini, Bashaj, Vërmiku dhe Ramica, me gjatësi rreth 10-15 kilometra.
Banorët, të pajisur me pankarta me thirrje si “Duam Rrugë”, “Nuk presim më” dhe “Kërkojmë Investime”, kërkuan ndërhyrje urgjente për rehabilitimin e segmentit që prej vitesh nuk ka parë asnjë investim.
Për disa minuta, ata bllokuan simbolikisht edhe rrugën hyrëse të fshatrave, për të tërhequr vëmendjen e autoriteteve ndaj problematikës së tyre të kahershme.
