Banorët e Rrjollit janë ngritur sërish në protestë në ditën e 25-të të tubimit të tyre, duke u përplasur me forcat e policisë. Ata kanë marshuar drejt kantierit ku ka nisur ndërtimi i resortit dhe kanë bllokuar fadromat e kompanisë që po kryen punimet.
Gjatë tensioneve dhe shtyrjeve me policinë, dy persona kanë mbetur të lënduar dhe janë dërguar në spital për ndihmë mjekësore.
Banorët shprehen të shqetësuar për përplasjet dhe kërkojnë ndërprerjen e punimeve deri në gjetjen e një zgjidhjeje për konfliktin mbi ndërtimin e resortit. Policia ende nuk ka dhënë një njoftim zyrtar për incidentin.
Prej një muaji, banorët e Rrjollit protestojnë kundër ndërtimit të resortit luksoz “Blue Borgo” nga biznesmeni Bashkim Ulaj, duke pretenduar se projekti po zhvillohet mbi tokat e tyre. Përplasjet mes banorëve dhe policisë janë shtuar dita-ditës, ndërsa ata përpiqen të bllokojnë punimet e kompanisë “Gener 2”.
