Banorët dhe bizneset përgjatë bulevardit “Epidamn” në Durrës kanë dalësërish në protestë kundër projektit “TID”, i cili parashikon prishjen e një sërë godinash në zonë. Ata shprehen se janë vënë përpara “zgjedhjeve të imponuara” dhe kërkojnë anulimin e vendimit për lirimin e pronave.
Sipas banorëve, vendimi për shembjen e banesave dhe bizneseve të tyre është marrë pa transparencë dhe pa një proces të qartë konsultimi. Përmes një peticioni që po firmoset nga komuniteti, ata i bëjnë thirrje Bashkia Durrës dhe Inspektorati i Mbrojtjes së Territorit të anulojnë vendimin për prishjen e objekteve.
Banorët pretendojnë se përzgjedhja e godinave që do të shemben është bërë në mënyrë klienteliste. Sipas tyre, ndërsa objektet ekzistuese parashikohen të prishen, në të njëjtën zonë kanë nisur punimet për ndërtimin e godinave të reja, çka sipas tyre ngre dyshime mbi kriteret e ndjekura.
Ata bëjnë të ditur se në mbrëmjen e 18 shkurtit, kryebashkiakja e Durrësit, Emiriana Sako, ka zhvilluar një inspektim në zonë, por pa zhvilluar takime me banorët. Sipas tyre, mungesa e komunikimit ka shtuar pasigurinë dhe shqetësimin mbi fatin e pronave.
Banorët paralajmërojnë se do të vijojnë kundërshtimin e projektit dhe kërkojnë transparencë të plotë nga institucionet përgjegjëse. Deri në momentin e publikimit të lajmit, nuk ka pasur një reagim zyrtar lidhur me pretendimet e ngritura nga komuniteti.
