Banorët e Baks-Rrjollit dolën në protestë këtë të mërkurë përpara Prokurorisë së Shkodrës, duke kërkuar përfundimin e vonesave njëvjeçare në hetimet që lidhen me pronat e tyre. Ata akuzuan publikisht se çështja po mbahet e bllokuar në institucion dhe se hetimet janë devijuar me qëllim, përmes ndryshimit të mënyrës së pyetjeve drejtuar ekspertëve topografë.
Protestuesit kërkuan një takim të drejtpërdrejtë me drejtuesit e prokurorisë dhe paralajmëruan se nuk do të ndalen derisa çështja të zbardhet plotësisht. Tensionet janë rritur edhe më shumë pas një ngjarjeje të ndodhur një ditë më parë në Lezhë, ku Gëzim Pjeshka, një nga përfaqësuesit aktivë të zonës, u shoqërua në polici gjatë një aktiviteti ku ishte i pranishëm kryeministri Rama.
Në një deklaratë për mediat, Pjeshka e cilësoi ndërhyrjen e policisë si të pajustifikuar, duke e interpretuar si presion ndaj komunitetit që kundërshton projektin e ndërtimit të një resorti turistik. Prej rreth tre muajsh, banorët e Baks-Rrjollit kanë vijuar qëndresën e tyre kundër këtij projekti, të cilin e konsiderojnë si cenim të pronave dhe dëmtim të mjedisit.
