Katër fëmijët e 36-vjeçares Marjola Nakoleci, e cila u vra në mënyrë tragjike në Volos nga bashkëshorti i saj, Pandeli Nakoleci, pritet të zhvendosen në ishullin e Skiathos, ku kujdestaria e tyre do t’i besohet tezes së tyre.
Ngjarja e rëndë ndodhi të premten e kaluar, kur 40-vjeçari vrau gruan e tij. Avokatja e familjes ishte e pranishme në gjykatën e Volos dhe bëri me dije se procesi ligjor për dhënien e kujdestarisë tek motra e viktimës është në përfundim, me vetëm disa detaje të mbetura për tu zgjidhur.
Vendimi përfundimtar pritet të merret nesër në mëngjes nga Prokuroria e Gjykatës së Shkallës së Parë në Volos.
Shërbimi Social ka përgatitur një raport pozitiv për dhënien e kujdestarisë tezes së fëmijëve, e cila jeton dhe punon në Skiathos.
Gjithashtu, të katër fëmijët kanë shprehur dëshirën për të qëndruar me tezen e tyre, ndonëse janë ende në gjendje shoku pas kësaj ngjarjeje të rëndë.
