Avokati i Popullit nis verifikimet në paraburgimin e Durrësit pas ankesës së bërë nga kryebashkiaku i Tiranës, Erion Veliaj. Komisioneri për parandalimin e Torturës, Ahmet Prenci, ka marrë kontakt me të paraburgosurin Veliaj dhe ka dëgjuar nga afër pretendimet e tij. Veliaj, përmes ankesës së bërë publike, thotë se iu shkelën të drejtat gjatë shoqërimit në klinikën private ku bëri kolonoskopinë.
Komisioneri Prenci ndërkohë është duke verifikuar dhe kushtet dhe trajtimin që i bëhet në paraburgim kryetarit të Bashkisë së Tiranës. Sipas planit të hetimit të rastit, Prenci ka parashikuar takim të dytë me Veliajn, ndërsa ka kërkuar zyrtarisht të gjithë praktikën e ndjekur për shoqërimin e tij nga paraburgimi drejt klinikës. Veliaj iu nënshtrua disa analizave mjekësore të rekomanduara nga mjekët.
