Automjetet luksoze të bosëve të krimit që janë sekuestruar nga SPAK janë shpërndarë nga Agjencia e Administrimit të Pasurive të Sekuestruara dhe Konfiskuara dhe po përdoren nga institucione qendrore dhe vendore.
Makinat e mbretit të kumarit Ervis Martinaj, i zhdukur pa gjurmë në 2022, i janë lënë në përdorim një bashkie të vogël, me qëllim që t’i përdorin për çështjet institucionale.
“Agjencia e Administrimit të Pasurive të Sekuestruara dhe Konfiskuara (AAPSK) ka aktualisht në administrim 190 pasuri të luajtshme, të përbëra nga automjete, motomjete dhe mjete lundruese. Gjatë vitit 2025, nga kjo kategori pasurish:
45 mjete i janë dhuruar institucioneve shtetërore, me vendim të Komitetit për kalimin e pronësisë pa pagesë;
32 mjete administrohen me qira, të cilat janë vënë në dispozicion të institucioneve shtetërore;
11 automjete janë kaluar në përdorim të Byrosë Kombëtare të Hetimit (BKH) dhe SPAK”, tha AAPSK gjatë një përgjigjeje zyrtare për VNA.
Sipas këtij institucioni, në total për vitin 2025, janë trajtuar 88 mjete nëpërmjet formave të ndryshme të administrimit dhe përdorimit institucional.
