Policia e Vlorës ka finalizuar me sukses operacionin policor të koduar “Në gjurmë”, duke vënë në pranga një prej autorëve të dyshuar të vrasjes së ndodhur më 27 prill 2025 në qytetin e Vlorës.
I arrestuari është shtetasi Kleanth Bylyku, i njohur edhe me aliasin Armando Gega, 42 vjeç, banues në Vlorë. Ai dyshohet si bashkëpunëtor në vrasjen me armë zjarri të shtetasit Renato Hoxhaj, 58 vjeç, ngjarje e ndodhur rreth orës 06:20 të mëngjesit, pranë Poliklinikës së qytetit, në lagjen “Hajro Çakërri”.
Nga hetimet e deritanishme të kryera nga Seksioni për Hetimin e Krimeve të Rënda në DVP Vlorë, rezulton se i arrestuari është pjesëtar i një grupi kriminal që vepron në fushën e krimeve të rënda dhe është i dënuar më parë për armëmbajtje pa leje.
Në bazë të provave të siguruara, Gjykata e Shkallës së Parë e Juridiksionit të Përgjithshëm Vlorë, me vendim të datës 30 korrik 2025, ka caktuar ndaj tij masën e sigurisë “arrest në burg”, për veprën penale “Vrasje me paramendim”, kryer në bashkëpunim.
Nga hetimet ka rezultuar se ekzekutori i dyshuar i krimit është një shtetas i huaj, aktualisht i shpallur në kërkim.
Policia e Vlorës vijon intensivisht veprimet për identifikimin dhe kapjen e bashkëpunëtorëve të tjerë të dyshuar, me qëllim zbardhjen e plotë të kësaj ngjarjeje të rëndë.
