Policia e Shtetit ka finalizuar një tjetër operacion të suksesshëm të bashkëpunimit ndërkombëtar, duke arrestuar në aeroportin “Nënë Tereza” shtetasin shqiptar Kamer Duhanxhiu, 44 vjeç, i dënuar në Itali me 30 vite burg për “Vrasje”, “Vrasje në rrethana cilësuese” dhe “Vrasje të mbetur në tentativë”, ngjarje të ndodhura në vitin 1999 në qytetin e Asti-t.
Duhanxhiu rezultonte në kërkim ndërkombëtar që prej vitit 1999 dhe prej shumë vitesh ishte fshehur në SHBA. Falë bashkëpunimit mes Fast Albania, Shërbimit Diplomatik të Sigurisë të SHBA-së, Policisë Kriminale Italiane dhe ICE në SHBA, ai ishte arrestuar më herët këtë vit në Florida.
Më 19 nëntor 2025, Duhanxhiu u deportua nga SHBA drejt Shqipërisë me fluturim çarter, ku u ndalua menjëherë në Rinas, në bazë të urdhrit të arrestit ndërkombëtar dhe “kartelës së kuqe” të Interpolit.
Ai pritet të ekstradohet në Itali për të vuajtur dënimin e tij 30-vjeçar.
