Agjencia e Mbikëqyrjes Policore Rajoni Durrës–Kavajë, në bashkëpunim me Prokurorinë e Posaçme Kundër Korrupsionit dhe Krimit të Organizuar, ka arrestuar në flagrancë punonjësin e policisë G. H., me detyrë Trupë Shërbimi i Trafikut Urban dhe Interurban në DVP Durrës.
Sipas AMP, arrestimi u krye pas veprimeve hetimore me metoda speciale, gjatë të cilave u provua se punonjësi i policisë kishte kërkuar dhe marrë nga shtetasi E. S. shumën prej 60 mijë lekësh të reja, në këmbim të nxjerrjes së mjetit nga pika e bllokimit dhe mosvendosjes së një mase administrative. Shuma e parave u sekuestrua në cilësinë e provës materiale.
Efektivi dyshohet për kryerjen e veprës penale “Korrupsion pasiv i personave që ushtrojnë funksione publike”.
Hetimet vijojnë në bashkëpunim me SPAK për të zbuluar nëse në këtë veprimtari të paligjshme mund të jenë të përfshirë edhe persona të tjerë.
