Policia e Kukësit ka finalizuar me sukses operacionin policor të koduar “Episodi”, duke vënë në pranga dy persona të dyshuar për një ngjarje të rëndë kriminale të ndodhur më 5 shtator 2025, në lagjen nr. 5 të qytetit.
Sipas njoftimit zyrtar, rreth orës 21:00 të asaj nate, gjatë një konflikti për motive të dobëta, është qëlluar me armë zjarri në drejtim të shtetasit H. A., pa shkaktuar të lënduar.
Pas hetimeve intensive, u arrestua autori i dyshuar, Frank Dida, 47 vjeç, banues në fshatin Pobreg, me precedent penal për armëmbajtje pa leje. Ai akuzohet për “Vrasje e mbetur në tentativë” dhe “Mbajtje pa leje e armëve dhe municionit”.
Në kuadër të të njëjtit operacion, u ndalua edhe nipi i tij, Sami Jeminaj, 23 vjeç, banues në Kukës, i cili akuzohet për “Moskallëzim krimi”, pasi dyshohet se ka qenë i pranishëm gjatë ngjarjes dhe nuk ka informuar autoritetet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
