Prokuroria e Durrësit po heton të gjithë zyrtarët, si dhe ish-drejtorin e burgjeve, lidhur me mënyrën e transferimit të Altin Ndocit nga një paraburgim i sigurisë së lartë në paraburgimin e Durrësit, që është i sigurisë së ulët. Gjithashtu, po verifikohen të gjithë të paraburgosurit që kanë qenë në të njëjtat qeli me të, si dhe është sekuestruar regjistri i takimeve për të parë se cilët janë personat që kanë pasur kontakt me të. Organi i akuzës po heton në dy drejtime: zyrtarët e burgut dhe shkeljet që kanë kryer, si dhe bashkëpunëtorët e Ndocit, që i dhanë ndihmë për arratisjen spektakolare. Altin Ndoci konsiderohet një person tejet i rrezikshëm dhe akuzohet për të paktën 5 vrasje.
