Pas vendimit të Gjykatës së Apelit të Juridiksionit të Përgjithshëm që rrëzoi dënimin me burgim të përjetshëm për Azgan Mërnicën, autorin e vrasjes së punonjësit të policisë Novruz Cenalia, dhe e dënoi atë përfundimisht me 35 vite burgim, reagoi Ministri i Brendshëm Besfort Lamallari.
Ai e cilësoi këtë vendim si një akt me pasoja të rrezikshme, që cenon jo vetëm emrin dhe sakrificat e punonjësve të policisë, si dhe kërcënon rendin ligjor dhe vetë shtetin.
“Edhe pse nuk jemi njohur ende me arsyetimin e plotë, vrasja e efektivit të ‘Shqiponjave’ Novruz Cenalia ishte një sulm i hapur ndaj vetë shtetit dhe rendit ligjor. Një akt i tillë nuk lëndon vetëm familjen e të ndjerit dhe dekurajon kolegët në uniformë, por rrezikon të japë një mesazh të gabuar për këdo që guxon t’i kundërvihet ligjit dhe shtetit të së drejtës. Respektojmë pavarësinë e gjyqësorit, por presim që drejtësia të jetë e fortë dhe në lartësinë e përgjegjësisë që ka ndaj qytetarëve dhe ndaj atyre që mbrojnë rendin çdo ditë”, theksoi Lamallari.
Novruz Cenalia u qëllua për vdekje më 13 maj 2024, pas një debati verbal që pati me Azgan Mërnicën për shpejtësinë me të cilën udhëtonte me makinë.
