Strukturat e Antiterrorit në Shqipëri kanë intensifikuar masat e sigurisë në institucionet diplomatike dhe pranë kampit të MEK, një ditë pas paralajmërimit të Ambasadës së Shteteve të Bashkuara për një kërcënim të mundshëm nga grupe të lidhura me Iranin.
Sipas burimeve, njësitë e Antiterrorit kanë zhvilluar takime me përfaqësues të Ambasadës Amerikane dhe asaj Izraelite për të koordinuar veprimet dhe për të rritur gatishmërinë ndaj çdo skenari të mundshëm.
Ndërkohë, Agjencia për Media dhe Informim e Qeverisë shqiptare i tha Radios Evropa e Lirë se agjencitë ligjzbatuese “nuk kanë asnjë informacion shqetësues” lidhur me paralajmërimin e ambasadës amerikane.
Megjithatë, pas sinjalizimit të SHBA-së për rrezik të mundshëm ndaj objekteve të lidhura me interesat amerikane dhe hapësirave publike në vend, masat e sigurisë janë rritur dukshëm në terren.
