Policia e Durrësit konfirmoi zyrtarisht se gjatë aksionit të zhvilluar ditën e djeshme ka arrestuar dy të dyshuar për armëmbajtje pa leje. Njëri prej të arrestuarve është Aldi Mustafa një person me rrezikshmëri të lartë shoqërore. Ai ishte i shpallur në kërkim policor nën dyshimet se kishte vënë tritol shtëpisë së fqinjit të tij L. Gjeçaj, ngjarje e ndodhur më 13 gusht 2025, me të cilin kishte konflikte të vazhdueshme.
“Gjatë operacionit u kapën dhe u vunë në pranga 2 shtetas, njëri me rrezikshmëri të lartë, konkretisht shtetasit A. M., 39 vjeç, dhe A. H., 23 vjeç, të dy banues në Durrës, të cilëve në momentin e arrestimit iu është gjetur një armë zjarri pistoletë, me fishek në fole gati për qitje.
39-vjeçari A. M., person me rrezikshmëri të lartë shoqërore, me precedentë të theksuar kriminal në fushën e krimeve kundër personit dhe armëmbajtjes pa leje. Ky shtetas ishte i shpallur në kërkim policor, i dyshuar si autor i ngjarjes së ndodhur më datë 13.08.2025, në lagjen nr. 14, Durrës, ku është vënë lëndë eksplozive banesës së shtetasit I. Gjeçaj”, njoftoi policia.
Aldi Mustafa ka dyshime të jetë përfshirë në krime të tjera të rënda, ndërsa i ka mbijetuar dhe një atentati me eksploziv. Ai njihet për lidhje me një grup të rrezikshëm kriminal po në zonën e Shkozetit.
