Një aksident i rëndë rrugor ka ndodhur mesditën e së enjtes në Itali, ku ka humbur jetën një i ri shqiptar. Viktima është Klaudio Gjoka, 20 vjeç, me origjinë nga Lezha, banues në Saluzzo.
Ngjarja tragjike u shënua rreth orës 11:30 në rrugën provinciale 589 (Saluzzo–Barge), në territorin e komunës Revello, në kilometrin e 53-të, pranë Abacisë së Stafardës. Sipas informacioneve paraprake, aksidenti u shkaktua nga një përplasje e fortë ballë për ballë mes një kamioni dhe një automjeti tip “Audi”, që drejtohej nga i riu shqiptar.
Përplasja rezultoi fatale për 20-vjeçarin Klaudio Gjoka. Pavarësisht ndërhyrjes së shpejtë të shërbimeve të emergjencës, për të riun nuk mund të bëhej asgjë dhe ai humbi jetën në vendngjarje.
Pas aksidentit, rruga u mbyll për disa orë, duke shkaktuar trafik të rënduar dhe kaos në zonë. Autoritetet italiane kanë nisur hetimet për të zbardhur shkaqet dhe rrethanat e plota të aksidentit. Mediat italiane raportojnë se ky është rasti i parë fatal në rrugët e rajonit “Granda” për vitin 2026.
Lajmi i hidhur është konfirmuar edhe nga familjarët e viktimës, ndërsa vëllai dhe të afërm të tjerë të Klaudio Gjokës kanë shprehur dhimbjen e tyre përmes postimeve prekëse në rrjetet sociale.
