Ditët e para të vitit 2026 kanë nisur me bilanc të rëndë aksidentesh rrugore. Mëngjesin e sotëm, një aksident i rëndë ka ndodhur në aksin Lezhë–Shkodër, në afërsi të fshatit Gocaj, ku si pasojë e përplasjes së fortë mes dy automjeteve kanë humbur jetën dy persona.
Viktimat janë identifikuar si bashkëshortët Elona Florini, 42 vjeçe, dhe Petrit Florini, 53 vjeç, banorë të Pukës. Petrit Florini ushtronte detyrën e efektivit të Policisë së Shtetit, ndërsa bashkëshortja e tij ishte mësuese.
Nga aksidenti kanë mbetur të plagosur edhe një grua me dy fëmijët, të cilët udhëtonin në mjetin tjetër të përfshirë në përplasje. Të plagosurit janë transportuar me urgjencë drejt spitalit, ku ndodhen nën kujdesin e mjekëve.
Për nxjerrjen e trupave nga automjeti i shkatërruar, në vendngjarje kanë ndërhyrë forcat zjarrfikëse, ndërsa më pas trupat e pajetë janë transportuar me ambulancë.
