Një aksident me pasojë vdekjen është regjistruar mbrëmjen e sotme në aksin rrugor Maliq–Lozhan. Sipas të dhënave paraprake, rreth orës 18:10, automjeti që drejtohej nga shtetasi D. Q., punonjës policie, ka përplasur këmbësorin B. H., rreth 67 vjeç.
Si pasojë e goditjes, 67-vjeçari ka humbur jetën në vendngjarje.
Drejtuesi i mjetit është shoqëruar në Drejtorinë Vendore të Policisë Korçë për veprime të mëtejshme procedurale.
Në vendngjarje ndodhen grupi hetimor dhe përfaqësues të Agjencisë së Mbikëqyrjes Policore, të cilët, nën drejtimin e Prokurorisë, po punojnë për sqarimin e rrethanave dhe shkaqeve të aksidentit.
