Në seancën e rradhës në GJKKO për procesin “Partizani”, ish-drejtori i klubit shumë sportësh, Afrim Tola, dëshmoi mbi gjendjen e aseteve përpara privatizimit. Ai deklaroi se objektet ishin të amortizuara dhe të zëna forcërisht nga familjarë, ndërsa vlerësimi i aseteve nga grupi i punës në atë kohë kapte shifrën e 20 milionë lekëve.
Gjatë marrjes në pyetje nga avokatët dhe Jamarbër Malltezi, Tola pohoi se fokusi i tij ishin sportistët dhe se nuk mbante mend kontakte me blerësit apo detaje të shkresave të vitit 2003.
Dëshmia e plotë:
Në periudhën 2006–2008 kam qenë drejtor i klubit shumë sportësh “Partizani”. Stafi ka pasur 5–6 punonjës, ndërsa pjesa tjetër nuk paguhej nga shteti. Sportistë ka pasur pafund, në të gjitha kategoritë. Ne kemi pasur një fond shumë të vogël, vetëm sportistët elitarë paguheshin. Për shumicën e sportistëve gjenim mundësi për t’i paguar. Te volejbolli është rregulluar palestra e volejbollit dhe palestra e mundjes.
SPAK: Tek privatizimi çfarë procedure ke kryer?
Tola: Kemi qenë një grup pune që jemi ngritur nga ministri për të evidentuar asetet e klubit dhe për të bërë vlerësimin. Nuk më ka kontaktuar njeri kur kam qenë drejtor.
Avokati Klodian Skënderja: Mbani mend të keni nënshkruar dokument për privatizimin?
Tola: Nuk e mbaj mend, kanë kaluar shumë vite.
Avokati: Ta vendos në dispozicion?
Gjykata: Pranohet.
Tola: Kemi qenë anëtarë të komisionit dhe kanë ardhur aty për të parë; gjë tjetër nuk mbaj mend.
Avokati: Në çfarë gjendje ishte ambienti?
Tola: I amortizuar; përveç atyre që jemi munduar t’i rregullojmë vetë, pjesa tjetër ishte e amortizuar, nuk kishte as derë.
Avokati: Inventarizimi çfarë përmbante?
Tola: S’e mbaj mend, kanë kaluar shumë vite. Në atë kohë mbaj mend që kishte familje që i kishin zënë ambientet.
Avokati Skënderaj: Keni vendosur shifër konkrete të inventarizimit?
Tola: Totali i vlerësimit ka qenë 20 milionë lekë.
Malltezi: A je në dijeni që ka një shkresë të vitit 2003 që tregon se shumë objekte janë të zëna forcërisht dhe ka pasur probleme me inventarizimin?
Tola: Nuk e mbaj mend, s’më kujtohet.
Tola: Jua thashë edhe më parë, në klubin shumë sportësh “Partizani” ka pasur pjesë të zëna forcërisht. Në 2006 është vlerësuar 20 milionë lekë.
Malltezi: E di sa është vlera e privatizimit?
Tola: Nuk e di sa është bërë.
Avokati Sokol Hazizaj: Çfarë detyre bëje, si fillonte detyra jote?
Tola: Unë merresha me sportistët. Nuk jam takuar me njeri në atë kohë; nuk e mbaj mend. Emrin e Fatmir Bektashit e kam dëgjuar, por nuk mbaj mend ta kem takuar.
