SPAK godet AKSHI-n, një institucion që prej vitesh është në qendër të akuzave dhe skandaleve lidhur me procedurat e tenderave. Mirlinda Karcanaj, drejtoreshë e Agjencisë Kombëtare të Shoqërisë së Informacionit, është vendosur nën masën e arrestit në shtëpi, ndërsa ndaj biznesmenit kontrovers dhe njëherazi njeriut që është konsideruar si eminenca gri e Edi Ramës, Ergys Agasi, është firmosur masa e arrestit në burg. Burimet thonë se Agasi nuk është vënë në pranga, pasi rezulton të ketë dalë jashtë vendit. Agasi dyshohet se është përfshirë në aferën e AKSHI-t bashkë me mikun e tij, biznesmenin Ermal Beqiri, ndaj të cilit po ashtu është caktuar masa e arrestit me burg.
Largimi i Agasit ka sjellë një përplasje të fortë mes SPAK dhe Policisë së Shtetit, pasi, siç dihet, drejtori i Përgjithshëm i Policisë së Shtetit, Ilir Proda, është investim personal i tij.
SPAK ka firmosur edhe masa të tjera sigurie, përfshirë dhe zyrtarë policie. Nga hetimet më shumë se njëvjeçare rezulton se Karcanaj ka favorizuar kompanitë e biznesmenit Ermal Beqiri dhe disa kompani satelite që fituan tendera milionësh. Ndërsa Agasi po ashtu rezulton se ka ndërhyrë për tenderët, të cilët janë kaluar të gjithë në një dorë. SPAK ka hetuar për veprat penale të korrupsionit, pastrimit të parave, shpërdorimit të detyrës dhe shkeljes së barazisë në tendera.
