Gjykata e Posaçme ka refuzuar kërkesën e zyrtares së lartë të Policisë së Shtetit, Ervina Gjana, për të marrë përsëri celularët e sekuestruar gjatë hetimeve për dosjen e AKSHI-t.
Burime pranë SPAK thanë se gjatë kontrollit në banesën e Ervina Gjanës dhe bashkëjetuesit, Renato Hristic, gjetën dhe sekuestruan 8 celularë si dhe dy lap top.
Hristic ka qenë shoqërues i biznesmenit të shumëkërkuar Ergys Agasi, ndërsa bashkëjetuesja e tij, Gjana aktualisht mban detyrën e drejtoreshës së Krimit Kibernetik në Policinë e Shtetit dhe njihet si një prej njerëzve më të besuar të Ilir Prodës.
Ervina Gjana e kundërshtoi kontrollin dhe iu drejtua gjykatës, pasi pretendonte se celularët i kishte përdorur ajo dhe jo bashkëjetuesi. Por SPAK mori miratimin e gjykatës edhe për kontrollin personal të zyrtares.
Gjykata rrëzoi kërkesën e Gjanës dhe e konsideroi të ligjshëm sekuestrimin e sendeve. Ervina Gjana ka qenë më herët e dyshuar për implikim në skandalin e ndërhyrjes në sistemin TIMS. Lidhur me AKSHI-n, SPAK zbuloi një grup kriminal dhe shpalli në kërkim Ergys Agasin, që konsiderohet si eminenca gri e Edi Ramës dhe Ermal Beqirin, ndërsa në arrest shtëpie janë dërguar drejtoresha e AKSHI-t, Mirlinda Karcanaj dhe zv.drejtoresha Hava Delibashi. Krerët e grupit kriminal Agasi dhe Beqiri dyshohen se urdhëruan rrëmbimin e rivalit të tyre në biznes, Gerond Meçe, dhe nën kërcënim ai u detyrua të tërhiqej nga tenderat e AKSHI.
