Grupi kriminal që u godit nga SPAK pasi trafikoi 6 ton drogë nga Amerika Latine në Europë, përdorte sistemin Hawala për të bërë transfertën e parave.
Në foton më lart është një kartëmonedhë e dollarit amerikan me mbishkrimin “BigXon”, pra pseudonimi që përdor në Sky ECC Ramazan Rraja, si dhe numri serial i kartëmonedhës që ka shërbyer si shenjë në transfertat për mënyrën e njohur Hawala për pagesën e blerjes së kokainës. Këto foto janë zbuluar në komunikimet mes anëtarëve të grupit.
Në një nga bisedat, Artur Hoxhosmani shprehet i shqetësuar për kapjen e një sasie prej 2 tonë droge. Kokaina ishte nisur nga Ekuadori në 2020 nga vëllezërit Artur e Klevis Hoxhosmani dhe ishte kamufluar në kuti me banane. Ajo u sekuestrua nga autoritetet në Portin e Roterdamit dhe vlera e drogës kapte shifrën e 151 milionë euro.
“Ra puna mram nga Ekuadori, 2 ton, çdo gjë në rregull sa zbriti në tokë nga anija e mori dogana,” thotë Artur Hoxhosmani. “Më ka dhimt në shpirt mu vëlla, jo më ju,” shprehet bashkëbiseduesi.
Të dyshuarit si anëtarë të grupit kriminal janë Plarent Dervishaj, Klevis e Artur Hoxhosmani, Erion Alibej, Ermir Ndreaj, Ilir Lloshi dhe Devid Petrut.
