Gjatë tubimit të zhvilluar nga subjekti politik Partia Demokratike, i cili sipas Policisë së Shtetit u përshkallëzua në akte dhune ndaj forcave të rendit, janë lënduar 6 punonjës policie.
Të dëmtuarit janë efektivë të Forcës së Posaçme “Shqiponja”, të Forcës Kombëtare të Sigurisë dhe të Policisë Rrugore. Ata po marrin ndihmë mjekësore në Spitalin e Traumës dhe në QSUT. Sipas policisë, gjendja e tyre shëndetësore është e stabilizuar dhe ndodhen jashtë rrezikut për jetën.
Policia e Shtetit bën të ditur se gjatë tubimit u bëri thirrje pjesëmarrësve, nëpërmjet Qendrës së Zërit, që të mos ushtronin akte dhune dhe të mos sulmonin punonjësit e policisë me bomba molotov dhe lëndë piroteknike, por një pjesë e protestuesve vijuan sulmet ndaj forcave të rendit.
Sipas njoftimit zyrtar, policia kishte marrë masa për ruajtjen e institucioneve, rendit dhe sigurisë publike, ndërsa thekson se mbetet e angazhuar për të garantuar ushtrimin e së drejtës qytetare për të protestuar.
Njëkohësisht, Policia e Shtetit dënoi aktet e dhunës ndaj punonjësve të saj në krye të detyrës dhe ndaj institucioneve shtetërore.
