Rreth 350 pasagjerë, të cilët udhëtonin nga Bergamo dhe Bologna drejt Aeroportit të Rinasit, janë devijuar për shkak të motit të keq dhe kanë mbetur të bllokuar në aeroportin e Brindisit, në Itali.
Pasagjerët, që kishin si destinacion përfundimtar Shqipërinë, vijojnë të qëndrojnë në ambientet e aeroportit, ndërsa ankohen për mungesë informacioni dhe zgjidhjesh nga kompania ajrore. Përballë situatës, ata kanë protestuar, duke penguar edhe funksionimin normal të shërbimeve në aeroportin e Brindisit.
Sipas pasagjerëve, kompania ajrore Wizz Air i ka braktisur, duke mos ofruar akomodim, transport alternativ apo sqarime të qarta mbi vijimin e udhëtimit drejt Rinasit.
