Fshati Goriçan në bashkinë Dimal vijon të vuajë pasojat e përmbytjeve të para tre ditëve, të shkaktuara si pasojë e hapjes së portave të digave. Rreth 300 hektarë sera në këtë zonë mbeten ende nën ujë, ndërsa dëmet në bujqësi dhe blegtori raportohen si shumë të mëdha.
Gjatë përmbytjes, serat ishin të mbjella me domate, speca, lakra, tranguj dhe kultura të tjera perimore. Niveli i ujit ka arritur deri në një metër në disa parcela, duke shkatërruar plotësisht prodhimin dhe duke e bërë të pamundur mbjelljen e fidanëve të rinj pa u tharë toka. Sasi të konsiderueshme produktesh të dëmtuara janë hedhur në kanale kulluese, pasi nuk mund të tregtohen.
Të njëjtin fat ka pësuar edhe një fermë blegtorale, ku rreth 70 krerë dele dhe qingja janë marrë nga uji, ndërsa janë shkatërruar edhe rezervat ushqimore. Fermerët deklarojnë se dëmet janë të pallogaritshme dhe se shumë prej tyre ndodhen në prag falimentimi.
Banorët theksojnë se fshati është përmbytur shtatë herë gjatë muajit dhjetor 2025 dhe fillimit të vitit 2026, ndërsa, sipas tyre, ndonëse dëmet janë verifikuar disa herë, nuk është dhënë asnjë dëmshpërblim. Ata kërkojnë mbështetje financiare për kompensimin e humbjeve dhe ndërtimin e një argjinature mbrojtëse, me qëllim parandalimin e përmbytjeve të përsëritura.
Sipas fermerëve, rikuperimi i tokës dhe nisja e një cikli të ri prodhimi do të jetë e mundur vetëm pas 2-3 muajsh, kur toka të jetë tharë plotësisht dhe të krijohen kushtet për mbjellje të reja.
