Një ngjarje e rëndë ka tronditur sot fshatin Bokshiq të komunës së Klinës, ku një person ka humbur jetën si pasojë e të shtënave me armë zjarri. Viktima është identifikuar si Faruk Isufi, i cili sipas raportimeve ka ndërruar jetë në Spitalin Rajonal të Pejës, si pasojë e plagëve të rënda të marra gjatë incidentit.
Për këtë rast, i dyshuar është vëllai i tij, Jetmir Isufi, ish-futbollist i KF Dukagjinit. Dyshohet se ngjarja ka ndodhur pas një mosmarrëveshjeje verbale mes tyre, e cila ka eskaluar në përdorim të armës së zjarrit.
Prokuroria Themelore në Pejë ka konfirmuar se i dyshuari është arrestuar dhe, me urdhër të prokurorit të shtetit, është ndaluar për 48 orë.
“Në vendin e ngjarjes kanë dalë të gjitha njësitet relevante policore dhe Prokurori i Shtetit nga Departamenti i Krimeve të Rënda. Është sekuestruar arma që dyshohet se është përdorur në rast, si dhe prova të tjera materiale,” thuhet në njoftimin zyrtar.
Sipas burimeve, viktima ishte edhe veteran i UÇK-së.
Hetimet për zbardhjen e plotë të rrethanave të kësaj ngjarjeje tragjike janë në vazhdim.
