Një ngjarje e rëndë ka ndodhur në orët e para të mëngjesit në Gjakova, ku si pasojë e të shtënave me armë zjarri një person ka humbur jetën dhe një tjetër ka mbetur i plagosur. Ngjarja është regjistruar rreth orës 05:30 në rrugën “Vëllezërit Frashëri”, ndërsa viktima është identifikuar si 38-vjeçari Rastim Binakaj.
Sipas informacioneve fillestare, i plagosur ka mbetur edhe një person tjetër, 29 vjeç, vëllai i viktimës, i cili është qëlluar në kraharor dhe është dërguar për trajtim në spital. Autoritetet mjekësore kanë konfirmuar vdekjen e viktimës në vendin e ngjarjes.
I dyshuari për vrasjen dhe plagosjen është Nexhdet Zymberaj, pronar i kafenesë “My Place”. Pas incidentit, ai është larguar nga vendi i ngjarjes në drejtim të panjohur dhe aktualisht është në kërkim nga Policia e Kosovës.
Në vendngjarje, policia ka gjetur dhe sekuestruar pesë gëzhoja të armës së zjarrit, si dhe një mjet të mprehtë, që dyshohet të jetë thikë. Lidhur me rastin, policia ka nisur hetimet për të zbardhur plotësisht rrethanat e ngjarjes.
Zëdhënësi i Policisë Rajonale në Gjakovë, Shermet Elezi, bëri të ditur se policia është njoftuar për rastin rreth orës 05:30 dhe se menjëherë në vendin e ngjarjes kanë dalë njësitë përkatëse policore dhe prokurori i shtetit. Ai konfirmoi se një person ka ndërruar jetë në vend, ndërsa tjetri është dërguar për trajtim mjekësor.
Ndërkohë, drejtori i Drejtorisë Rajonale të Policisë në Gjakovë, Lumni Graishta, deklaroi se dyshohet që ngjarja të ketë ndodhur në një lokal në zonën e Çarshisë së Vjetër, pas një mosmarrëveshjeje mes pronarit të lokalit dhe një klienti. Sipas tij, i dyshuari është një person i njohur për policinë dhe aktualisht ndodhet në arrati.
Policia e Kosovës ka bërë të ditur se njësitë e saj janë në kërkim të të dyshuarit, ndërsa në vendngjarje po kryhen procedurat e nevojshme hetimore nën mbikëqyrjen e prokurorit të shtetit, me qëllim zbardhjen e plotë të ngjarjes.
