Sipas regjistrave të Gjendjes Civile Osmane, Mehmed Mehdi Bej Frashëri ishte djali i Rauf (ndoshta duhet Ragip) Beut, kajmakam (nënprefekt) i kazasë së Meçovës. Ai ka lindur në vitin 1873 (1289 sipas kalendarit hixhri) në fshatin “Frashër” të vilajetit të Janinës. Ka ndjekur mësimet në Idadinë e Manastirit deri në korrik 1893, më pas është diplomuar në Shkollën e Lartë të Administratës në Stamboll (Mekteb-i Mülkiye-i Şahâne) në korrik të vitit 1897.
Në shtator 1897, u emërua në shërbimin civil të vilajetit të Cezayir-i Bahr-i Sefid (Algjerisë së Detit të Bardhë). Krahas kësaj detyre, nga tetori i vitit 1897 për një vit dha mësim në Medresenë e Sulejmanijes në Rodos për lëndët Histori, Gjeometri, Algjebër etj. Më vonë shërbeu si zv/kajmakam në Kerpe dhe në Kashot.
Në vitin 1901 u transferua në Peklin të vilajetit të Manastirit, në vitin 1903 në Ohër, në vitin 1906 në Dardhere dhe Çorlu, dhe në maj 1908 u emërua kajmakam i Luleburgazit.
Në shtator 1908, Mehdi Beu u emërua në sanxhakun e Sjenicës, më pas në janar 1909 në Siroz, dhe në tetor të po atij viti me titullin “becayiş” (transferim reciprok), u transferua në prefekturën e Xhanik-ut. Së fundi, në qershor 1911, u emërua në mutasarrifatin e Kudusit (Jeruzalemit).
Pas Luftërave Ballkanike, në shtator 1912, Mehdiu shkoi në Shqipëri pak pas shpalljes së autonomisë së saj.
(Kjo është CV sipas arkivit osman)
***
Përveç detyrave të rëndësishme në administratën e shtetit shqiptar, Mehdi Frashëri është autor i disa librave me karakter historik, juridik, letrar dhe socio-ekonomik. Por, kontributi i tij real në aspektin studimor është i shpërndar në qindra artikuj në faqet e shtypit shqiptar. Për fat të keq vepra e tij ende nuk është botuar në një kolanë, siç e meriton një intelektual i këtij kalibri.
***
Mehdi Frashëri është autor edhe i një studimi për kapitulacionet në Perandorinë Osmane në vitin 1908, i cili pas njëqind vjetësh u transkiptua dhe u ribotua nga një profesor turk në vitin 2008.
Nga Hasan Bello
