Një serial që mund ta shohësh ndërsa pret autobusin ose pi kafenë po shndërrohet në një nga formatet me rritjen më të shpejtë në industrinë amerikane të argëtimit.
Quhen microdramas: seriale të xhiruara vertikalisht për ekranin e telefonit, me episode që zakonisht zgjasin nga vetëm 45 sekonda deri në dy minuta.
Formati u zhvillua fillimisht në Kinë, por tashmë po fiton me shpejtësi audiencë në Shtetet e Bashkuara.
Sipas të dhënave të Omdia të cituara nga Reuters, rreth 66 milionë përdorues aktivë në muaj panë microdramas në SHBA gjatë vitit të kaluar, më shumë se dyfishi i rreth 26 milionëve të vitit 2024.
Industria pritet të gjenerojë rreth 1.5 miliardë dollarë të ardhura në SHBA gjatë vitit 2026 dhe mund të arrijë rreth 2 miliardë dollarë vitin e ardhshëm.
Sekreti është telefoni.
Në vend të episodeve 30 ose 60-minutëshe, historitë ndahen në dhjetëra pjesë të vogla dhe çdo episod përfundon zakonisht në një moment që e shtyn shikuesin të hapë menjëherë tjetrin.
Edhe ekonomia e prodhimit është shumë ndryshe nga Hollywood-i tradicional. Një microdrama prej 50–75 episodesh mund të kushtojë rreth 100 mijë deri në 300 mijë dollarë, ndërsa vetëm një episod i një sitcom-i tradicional mund të kushtojë disa milionë.
Inteligjenca artificiale po e përshpejton më tej procesin, duke u përdorur në disa studio për elemente të prodhimit dhe për krijimin më të shpejtë të përmbajtjes.
Kompanitë e mëdha amerikane po e ndjekin fenomenin. NBCUniversal dhe Fox janë mes grupeve që po eksplorojnë tregun e videove dramatike vertikale.
Në një moment kur Hollywood-i tradicional po përballet me tkurrje, telefoni mund të jetë duke krijuar një industri të re pikërisht përpara syve të tij.
