Më shumë se 10,000 hotele evropiane kanë nisur një padi kolektive kundër gjigantit të rezervimeve “Booking.com”, duke e akuzuar për shtrembërimin e tregut dhe shkaktimin e humbjeve financiare gjatë një periudhe 20-vjeçare. Nismën ligjore po e udhëheq Shoqata e Hoteleve, Restoranteve dhe Kafeneve në Evropë (Hotrec), e cila përfaqëson industrinë e hotelerisë brenda Bashkimit Evropian. Afati për t’u bashkuar me padinë është zgjatur deri më 29 gusht, për shkak të interesimit të lartë nga pronarët e hoteleve. Padia, e cilësuar si një nga më të mëdhatë në historinë e sektorit të hotelerisë evropiane, mbështetet nga 30 shoqata kombëtare, përfshirë edhe atë të Britanisë. Sipas Hotrec, “Booking.com” ka përdorur klauzolën e “çmimit më të mirë” për t’i ndaluar hotelet që të ofronin tarifa më të ulëta në platforma të tjera ose në faqet e tyre zyrtare.
Shoqata pretendon se ky mekanizëm është imponuar përmes presionit të madh dhe ka penguar konkurrencën e ndershme, duke parandaluar edhe rastet e ashtuquajtura “free-rider” – kur klientët gjejnë një hotel në “Booking.com”, por më pas rezervojnë direkt tek menaxhmenti.
“Regjistrimet po rriten ndjeshëm, dhe reagimi i industrisë tregon një dëshirë të fortë për të kundërshtuar praktikat e padrejta në tregun digjital”, theksohet në deklaratën e Hotrec.
Nëse padia rezulton e suksesshme, ajo pritet të vendosë një precedent të rëndësishëm ligjor për marrëdhëniet mes platformave online dhe sektorit të hotelerisë në Evropë.
