Spanja po përballet me një nga sezonet më të rënda të zjarreve në dekadat e fundit, me mijëra hektarë pyje të shkatërruara dhe dhjetëra vatra aktive në disa rajone të vendit.
Në provincën e Zmoras, flakët e fuqizuara nga erërat e forta kanë përfshirë sipërfaqe të gjera pyjore. Përveç mijëra zjarrfikësve të angazhuar, rreth 1900 ushtarë janë dërguar për të ndihmuar operacionet, ndërsa Forcat e Armatosura spanjolle kanë vënë në dispozicion mjete tokësore dhe ajrore.
Në mbështetje të autoriteteve vendase, në Spanjën veriore kanë mbërritur edhe njësi gjermane të zjarrfikësve.
Policia spanjolle ka njoftuar arrestimin e 23 personave të dyshuar për zjarrvënie të qëllimshme, ndërkohë që deri më tani katër persona kanë humbur jetën nga pasojat e zjarreve.
Sipas Sistemit Evropian të Informacionit për Zjarret në Pyje, mbi 382 mijë hektarë tokë janë djegur në Spanjë gjatë këtij viti – më shumë se dyfishi i sipërfaqes së Londrës metropolitane dhe gjashtëfish më e madhe se mesatarja e viteve 2006–2024 për të njëjtën periudhë. Kjo verë konsiderohet si një nga më shkatërrueset për Spanjën, megjithatë autoritetet shpresojnë se fundi i një vale të gjatë të të nxehtit dhe reshjet e pritshme të shiut do të lehtësojnë gjendjen në ditët në vijim.
