Autoritetet lituaneze kanë bërë të ditur se bllokimi i Aeroportit Ndërkombëtar të Vilniusit gjatë fundjavës ka qenë pasojë e një incidenti të pazakontë, pasi në hapësirën ajrore të vendit u konstatuan balona meteorologjike që transportonin cigare kontrabandë nga Bjellorusia fqinje. Sipas zyrtarëve të Qendrës Kombëtare të Menaxhimit të Krizave, ky incident detyroi mbylljen e përkohshme të aeroportit për disa orë, duke ndikuar në rreth 6,000 pasagjerë dhe 30 fluturime që u pezulluan ose u devijuan për arsye sigurie.
Policia lituaneze konfirmoi se ka gjetur 11 balona dhe rreth 18,000 pako cigaresh të kontrabanduara në zona të ndryshme të vendit. Zëdhënësi i Qendrës Kombëtare të Menaxhimit të Krizave, Darius Buta, tha se dy nga këto balona kanë fluturuar mbi Aeroportin e Vilniusit, duke shkaktuar alarm për një ndërhyrje të mundshme ajrore të paligjshme.
“Dy nga balonat e identifikuara, të cilat kontrabandistët i përdorin shpesh për transportin e mallrave të paligjshme nga Bjellorusia, kaluan mbi hapësirën ajrore të aeroportit, çka detyroi autoritetet të ndalonin përkohësisht fluturimet për të garantuar sigurinë e pasagjerëve dhe të infrastrukturës,” deklaroi Buta.
Sipas të dhënave paraprake, deri në 25 balona janë parë duke fluturuar mbi territorin e Lituanisë nga ora 20:45 të së shtunës deri në orën 04:30 të mëngjesit të së dielës. Ngjarja ndodhi në një kohë kur vendet evropiane janë në gjendje gatishmërie të lartë, për shkak të rritjes së numrit të incidenteve me dronë të paligjshëm në hapësirat ajrore të vendeve të BE-së. Udhëheqësit evropianë kanë akuzuar Rusinë për ndërhyrje dhe provokime ajrore, përfshirë një incident masiv me dronë në Poloni muajin e kaluar – pretendim të cilin Moska e ka mohuar kategorikisht.
Kujtojmë se më 10 korrik 2025, autoritetet lituaneze kishin gjetur një dron Gerbera të prodhuar në Rusi, që kishte hyrë në territorin e tyre nga Bjellorusia, një aleat i ngushtë i Moskës. Një tjetër incident i ngjashëm u regjistrua në fund të korrikut, kur një dron u rrëzua në një poligon stërvitjeje ushtarake më 28 korrik, dhe një tjetër u zbulua në fillim të gushtit.
Në përgjigje të këtyre shkeljeve ajrore, Lituania shpalli një zonë ndalimi fluturimi prej 90 kilometrash përgjatë kufirit me Bjellorusinë, me qëllim që forcat e armatosura të kenë mundësi të reagojnë menjëherë dhe të rrëzojnë dronët pa pilot që shkelin hapësirën ajrore të vendit.
