Mbretëresha Camilla ka qenë viktimë e një tentative për sulm seksual gjatë adoleshencës së saj dhe është mbrojtur duke përdorur thembrën e këpucës kundër agresorit. Ky zbulim bëhet i ditur në librin e ri të autorit Valentine Low, Power and the Palace, sipas së përditshmes britanike Sunday Times, e cila ka parë përmbajtjen e botimit.
Sipas rrëfimit, Camilla e ka ndarë këtë episod personal me ish-kryeministrin britanik Boris Johnson në periudhën kur ai ishte kryebashkiak i Londrës (2008–2016). Ish-shefi i komunikimit i Johnson, Guto Harri, kujton se gjatë një takimi në Clarence House në vitin 2008, Mbretëresha Camilla i kishte treguar Johnson-it për ngjarjen e ndodhur në rininë e saj.
Harri rrëfen se Camilla i kishte treguar Johnson-it se kur ishte rreth 16 ose 17 vjeç, gjatë një udhëtimi me tren drejt stacionit Paddington, një burrë kishte tentuar ta ngacmonte seksualisht. “Unë bëra atë që më kishte mësuar nëna. Hoqa këpucën dhe e godita fort me thembër,” i kishte thënë ajo Johnson-it.
Më tej, Camilla ishte treguar e vendosur edhe pas mbërritjes në stacion. Ajo kishte gjetur një punonjës të trenit në uniformë, i kishte shpjeguar ngjarjen dhe agresori u arrestua menjëherë.
Mbretëresha Camilla, sot 78 vjeç, prej kohësh është një zë i fuqishëm në mbështetje të viktimave të dhunës seksuale dhe dhunës në familje. Një nga nismat që ajo ka promovuar është dhurimi i çantave të saj personale për personat që kanë përjetuar sulme të tilla, një ide e kthyer tashmë në një trend mbështetës në vitet e fundit.
Ky zbulim i ri hedh dritë mbi një pjesë më pak të njohur të jetës së Mbretëreshës Camilla dhe tregon arsyet pse ajo ka zgjedhur të jetë një mbrojtëse e fortë e të drejtave të viktimave të dhunës.
