Rusia dyshohet se po i furnizon Iranin me informacione për pozicionet e forcave amerikane në Lindjen e Mesme, të cilat mund të përdoren për sulme ndaj objektivave të SHBA-së. Kështu raporton Washington Post, duke cituar tre zyrtarë që kanë dijeni për çështjen.
Sipas burimeve, që nga nisja e konfliktit fundjavën e kaluar, Moska i ka dërguar Teheranit të dhëna për vendndodhjen e mjeteve ushtarake amerikane, përfshirë anije luftarake dhe avionë.
Zyrtarët, që folën në kushte anonimiteti për shkak të ndjeshmërisë së informacionit, thanë se bëhet fjalë për një përpjekje të gjerë për ndarjen e të dhënave. Megjithatë, shkalla e saktë e ndihmës ruse mbetet ende e paqartë.
Burimet theksojnë se aftësitë e Iranit për të identifikuar objektivat amerikane janë dëmtuar në ditët e para të luftës, çka e bën këtë informacion veçanërisht të rëndësishëm për Teheranin.
Që nga fillimi i konfliktit, Irani ka lëshuar mijëra dronë dhe qindra raketa kundër bazave ushtarake amerikane, ambasadave dhe objektivave civile, ndërsa fushata ushtarake e përbashkët e SHBA-së dhe Izraelit ka goditur më shumë se 2,000 objektiva në territorin iranian.
Sipas disa analistëve, një konflikt i zgjatur mes SHBA-së dhe Iranit mund të sjellë përfitime gjeopolitike për Rusinë, duke rritur të ardhurat nga nafta dhe duke zhvendosur vëmendjen e Perëndimit nga lufta në Ukrainë.
